المساعد الشخصي الرقمي

مشاهدة النسخة كاملة : نص إحساس

ضياء عاصى
10-06-2007, 05:11 AM
نصف إحساس
*
*
*
القلب الوحـــيد مخدوش
و الورد باهت مـ عرفوش
البسمـــه أمل
و الأمل فى السراب مغشوش

زحمه عدت من عليا
سرسبت صمودى فيــّا
بس سابت مــ الحنين يادوب وشوش

بـ تسلى يمكن بالصور
و اتخيلــك ...
و جنبك أتخيل شجر
و مركبه ... و شموع قمــر
نفتح قلوبنا للشراع
و اللى ضاع مـ نسيبــوش

* * *
يا قلبى يا مركبه
وصى موجك عالقلوع لــ تقلعكـ
ترميك فى مرسى مــ الدموع
و دمع غيرك يوجعكـ

* * *
مشروخ ياصوت سواقينا
شـَجـَرنـــا بيضَلـِلـَكـ
و فوق كتافنا بنِحـْـمِـلـَـكـ .. وِ نحَمـِـلـَكـ
رغم إنك فيك حمـــول بتــألِـمَـكـ
حواليك بيضحك كل لون
ساكن انت بـ لون همومكـ
نفسى أدخل جوه كونكـ
نفسى أشرب من سكونكـ
و يــا خوفى أفطس مـ الذهول

***

بيـشـقـشـق الفجر على خدود المدى
و الدمع مرسوم عـ الندى
كـــأن جرح الضحكه فَرض
فيكـ أيه يا ورد ...؟
مش كنت طول الليل بتســأل
نفسى حلمى يكون لـُـه أرض
عاوز أكتر من كده .. ؟
بـيـشـقـشـق الفجر على خدود المدى

***
دارى وِجهَــك يا قمرنا ... مـ تكتملش
مش ح تنســانا همومنــا .. مـ تـتـرسمش
مفيش فى ليل الوحده نـــوم
و مفيش قمر بيشيل همـــوم
انت عايش طول حياتك عالى فوق
و إحنا كعب رجولنا دايب مـ الشقوق
مـالكش فيـــنا ... مـ يتحكمش

بس إبعد .. لــ جل ليـلنا مـ يتاوينا
عيون ... من تعـَـبها بتغافينـــا
و عيون ... من تعـَـبها مــ تبـتـسمش
دارى وجهك يا قمر ... مـ تـتـرسمش

***
ياليــالى إستحـــاله يكــونلى ليــه .. ؟
ياليــالى خدتى منى حُب عُمرى ... و باقى أيه .. ؟
نفسى أعرف أيه اللى نفسى تانى فيه .. ؟
عشت طول العُمر لـِيــِه ... بس عُمرى هــان عليـِه
حـــنـّا دمعى بـ لـــون عيونــُه
حـببنى فى جفاءُه و ظُنــونـُـه
سلمتلـُه و مـ عرفش أخونـُه


ياليـــالى أُوعى تـنسـِـيه و تـخونيـِـه
لو بيســأل عن حيـــاتى طـَمنيه
قولى عـــااااااااااايش فـ الأمـــانى
ناسى إنه كـــان فى بالى
و السهر كمــان ناسيــه

*
*

عاصى .... 8 / 6 / 2007
ضياء عاصى
18-06-2007, 06:11 AM
نفـــرح ...

و نحس الفرحه ضـــد

نسأل ... فـــرحنا ليه .. ؟

و سؤالنـــا مالهـــوش رد

سؤالنــا فيــنا ... و الليل حاوينـــا

و الـحُــزن مـ بيتهــد
ضياء عاصى
22-06-2007, 07:13 PM
زى كُـــل حاجه مــ بتحلـــو فــ عنينــــا

و فجأه يخطفها الزمان من بين أيدينا

زى مـ بتدبــــل مشاعر لــــنتظـــار

و اللى عــشناه يصبح مـــرار

و تمــــوت حاجات ...

وريحة المـــوت لسه فينـــا



أهــــــــــــواكـ

و إنت من تغيـــيرى أصعب

و انت لو هجرك سنين ... من روحى أقـــرَب

و إنت لو جرحك أليم ... مــ يهون عليــنا

زى كــُل حاجه مــ بتحلـــو فــ عنينــا
سلسبيل
24-06-2007, 03:32 AM
الله الله الله
شو ها الكلمات يا أخ ضياء عن جد كلمات كثيير حلوة
الله يعطيك العافية أخي
تقديري
ضياء عاصى
27-06-2007, 03:24 AM
الله الله الله

شو ها الكلمات يا أخ ضياء عن جد كلمات كثيير حلوة
الله يعطيك العافية أخي

تقديري


أهلا بك أخت سلسبيل

شكرا على مرورك و ردك الطيب

تحيــــاتى
شاعر البادية
11-07-2007, 05:45 AM
الحقيقه يا أخ ضياء انا شايف انك متأثر كتييييييييييييييييييييييييييييير بأغاني المطرب محمد منير
وبما اني اعرف عنك انك انسان حساس فمش مستغرب الشبه الكبيييييييييييييييييييير بين الكلام اللي انت كاتبه وبين أغاني لمحمد منير .... يمكن لو خلينا العنوان كوكتيل يكون احسن
تقبل نقدي بروح مرحه
ابن العراق
11-07-2007, 06:52 PM
لا معلش يا دكتور إسمحلي أختلف معاك , الباشمهندس ضياء ما بيسمعش محمد منير أصلا ..
بالرغم من إني حسيت إني بسمع عنقود العنب وشجر اللمون مع بعض , بس في نفس الجو مع إختلاف الألفاظ ... وبعدين ما تنساش إن الجيل التاني من آباء العامية المصرية هما اللي بيكتبو لمحمد منير :
سيد حجاب , بيرم التونسي , صلاح جاهين , فؤاد حداد , مجدي نجيب _ مين مجدي نجيب ده ؟؟؟ ليكونشي إبن نجيب _ , عبد الرحمن الأبنودي وأحيانا أحمد فؤاد نجم ..
يعني يوم ما تحب تكتب عامي , صعب إنك تتخطي أي حد من الناس دول , لازم يكون في تأثر بأي حد منهم ... أو بالكوكتيل ده على بعضه .
أنا شخصيا عجبتني جداً الخاطرة , وبصراحه أنا شايف إن ضياء في العامي أستاذ لا ينازع ..
وعجبتني جداً دي :
دارى وِجهَــك يا قمرنا ... مـ تكتملش
مش ح تنســانا همومنــا .. مـ تـتـرسمش
مفيش فى ليل الوحده نـــوم
و مفيش قمر بيشيل همـــوم
انت عايش طول حياتك عالى فوق
و إحنا كعب رجولنا دايب مـ الشقوق
مـالكش فيـــنا ... مـ يتحكمش
برافو يا ضو ,, بالتوفيق .
ضياء عاصى
12-07-2007, 03:38 AM
أولا شكرا على مرور كل من :

الأخ شاعر الباديه ( مسافر زاده البقدونس )

الأخ ابن العراق ( الننجا تيرتلز )

ثانيا :

بالرغم من اختلاف الردين الا انى حسيت بنفس الطعم الرائع

تحياتى لكما و شكرا
شاعر البادية
12-07-2007, 05:58 AM
تصدق بالله ( الازمه بتاعتي اللي مالهاش لازمه) ان الحاجه الوحيده اللي مبحبهاش في الخضار هي البقدونس برغم عشقي اللامتناهي للجرجير والكرات والبصل وتأتيراتهم اللامحدوده...
عموما انا كنت بس بنكشك يمكن تكون نسيتني...
بالمناسبه.. الليلادي وانا في كشك السجاير الشهير ب (بنده) أو ( بنضه)علي رأي استشاري العظام زميلي اللي انا مابقبلوش ,,,, وانا ماشي في امان الله في قسم الخضروات ضربت ايدي في باسكت الجرجير طلعت معايا احلي ربطة.. بس لقيتها بتتشد من ايدي !!!! أتاري في ايد تانيه ماسكاها من الناحية التانيه !!
تعرف ايد مين دي يا ضيا؟؟؟
الايد اللي قدمتلنا الجاتوه و العصير يوم ماكنا في زياره صاحبنا بتاع المنصوره .... أتاري كل العيله بتحب الخضار زيي ولقيتهم هاجمين عليا سلامات و تحيات
وربنا يجازيك خير علي معارفك الطيبين يا معلم
مسافر زاده الخضار











0
رنا
19-07-2007, 05:08 PM
كلمات صادقه ورائعه

بالذات انها بللهجه المصريه فده طبيعي انها تكون جميله جدا

كلمات ولا أروع

تحياتي لخالو العزيزhttp://www.abadlah.com/vb/images/icons/icon23.gif**ضياء عاصي**